【電影「景」然喺度拍?!】揭曉10大港產片取景地點!

近年有唔少大熱嘅香港電影都引發咗一股打卡熱潮，令大家都特登去返電影入面嘅實際場景朝聖。香港嘅大街小巷經常成為電影嘅主要場景，可能你屋企樓下間茶餐廳就係其中一個取景地！早前我哋就出咗個【電影「景」然喺度拍?!】小測驗考考大家，而家就揭曉10條問題嘅電影場景答案。

你都想體驗下做電影主角？咁就即刻睇答案發掘香港電影嘅打卡熱點！

1. 以下來自電影《幻愛》(Beyond The Dream) 的劇照是在哪裡取景？

答案: 屯門碼頭海濱長廊

《幻愛》(Beyond the Dream) 有唔少場景都取材自屯門，而屯門碼頭海濱長廊更被網民命名為「幻愛橋」。

2. 請問圖片中的工業大廈是近年哪套戲的取景地？

答案: 《窄路微塵》(The Narrow Road)

成套電影主要戲份都喺土瓜灣金賜工業大廈取景，當中窄哥（張繼聰飾演）經營嘅小飛俠清潔公司就係位於呢座工業大廈。

3.《媽媽的神奇小子》(Zero to Hero) 中的大水管位於哪個地區？

答案: 上水/北區

《媽媽的神奇小子》(Zero to Hero) 入面，蘇樺偉（梁仲恆飾演）同蘇媽（吳君如飾演）喺火車軌旁邊練跑，最終跑得「快過火車」，呢個經典一幕正正就喺上水雙魚河畔嘅巨型水管陣拍攝。

4.《那夜凌晨，我坐上了旺角開往大埔的紅VAN》(The Midnight After) 曾在以下餐廳取景，請問餐廳名稱是？

答案: 華輝小廚餐廳

華輝小廚餐廳自1981年開業到而家已經屹立大埔超過40年，而且亦都曾經憑雞批入選《米芝蓮指南》，所以套戲亦都稱佢為「米芝蓮雞批茶餐廳」。

5. 電影《正義迴廊》(The Sparring Partner) 曾在這裡取景，並用黑白交代兩兄弟和表姐如何派傳單找父母。除了這套戲，以下還有哪套港產片曾在這裡取景？

答案：《李小龍傳》(Dragon: The Bruce Lee Story)，《爆裂刑警》 (Bullets Over Summer)，《省港奇兵3》 (Long Arm of the Law III)：以上皆是

電影《正義迴廊》(The Sparring Partner) 入面，由楊偉倫飾演嘅張顯宗同女神表姐、阿哥一齊派傳單搵阿爸阿媽嘅一幕，就係喺呢度取景。

6. 《毒舌大狀》(A Guilty Conscience) 中，男主角林涼水曾和好兄弟陸定衡在哪一個球場談心?

答案: 麥花臣遊樂場

位於旺角區中心地帶嘅旺角麥花臣遊樂場，設有1個七人小型足球場同2個籃球場，同時亦可以作為排球場。喺《毒舌大狀》入面，死黨陸定衡（林保怡飾演）安慰情緒低落嘅林涼水（黃子華飾演）呢一幕，就係喺麥花臣遊樂場嘅觀衆席上面拍攝。

7. 電影《淪落人》(Still Human) 是在哪條屋村拍攝？

答案: 何文田愛民邨

《淪落人》嘅故事取景都係嚟自何文田愛民邨，呢度亦係導演兼編劇陳小娟由細到大成長嘅地方。

8. 電影 《阿媽有左第二個》(Mama’s Affair) 中男主角在永發茶餐廳工作，他踩單車送外賣的場景經過了廣東道與登打士街的交界路段，這條街俗稱是什麼？

答案: 五金街

電影入面男主角姜濤喺招牌林立嘅街道踩單車送外賣一幕非常經典，呢條街位於廣東道同登打士街嘅交界路段，呢一帶嘅店舖以五金舖為主，所以被稱為「五金街」。

而喺呢套戲之後，永發茶餐廳亦引起咗一段打卡熱潮，吸引唔少姜糖同鏡粉去打卡潮聖。

9. 電影《緣路山旮旯》(Far Far Way) 中，陳漢娜飾演的Lisa住在哪裡？

答案: 沙頭角梅子林

電影中由陳漢娜飾演嘅Lisa係個駐村藝術家，負責畫村內嘅壁畫，現實中呢啲壁畫全部都係出自村入面嘅藝術家兼作家葉曉文之手。

位於新界東北吊燈籠北坡嘅梅子林村絕對可以算係香港嘅山旮旯。梅子林村擁有近400年嘅客家歷史，出入梅子林只有一個方法，就係沿荔枝窩自然步道步行25分鐘或者乘搭水上巴士，再步行前往梅子林。

10. 電影《濁水漂流》(Drifting) 的「木屋」在哪裡？

答案: 荔寶路

《濁水漂流》(Drifting) 嘅故事取材自通州街天橋底嘅木屋，但實際上戲中嘅木屋係喺荔枝角荔寶路天橋底搭建。

希望大家參加完小測驗或睇完答案之後，都對港產片有更深嘅興趣同進一步嘅認識！

錯過咗今次有獎小測驗？唔緊要！而家我哋仲舉行緊大熱嘅小測驗【AI真假驗眼所👀】，考下你可唔可以分辨出「AI繪製」同「真人創作」嘅畫作/影像，仲會送出Kodak Ektar H35半格菲林相機俾答啱得最多嘅兩位同學仔！

同埋！估歌仔系列重出江湖！今次主題係廣受歡迎嘅K-Pop！自認係K-Pop博士嘅你又夠唔夠擔挑戰 ? 答啱得最多嘅一位仲有機會獲得(G)I-DLE演唱會2023香港站嘅門票兩張，等你可以入場盡情High！仲有好多有獎活動等你參與，仲唔快啲去做我哋會員報名參加！

【K-Pop估歌仔🎶】

立即報名!

【AI真假驗眼所👀】

立即報名!

【主子鬥一番MEME圖大戰】

立即報名!

【等你投稿第一彈 – 召喚景點試伏師!】

立即投稿!

【等你投稿第二彈 – 大學冷知識】

立即投稿!